ഉദ്ദേശ്യം (നിയ്യത്ത്) ശരിയായാൽ മാത്രം

ചോദ്യം

ഉദ്ദേശ്യം (നിയ്യത്ത്) ശരിയായാൽ മാത്രം ബിദ്അത്തോ ശിർക്കോ അനുവദനീയമാകുമോ?

ഇല്ല. നല്ല ഉദ്ദേശ്യം മതി എന്ന് കരുതി ബിദ്അത്തോ ശിർക്കോ ദീനിൽ അനുവദനീയമാകില്ല. ആരാധനയ്ക്ക് ശരിയായ നിയ്യത്തും ഖുർആനും സുന്നത്തും കാണിച്ച രീതിയും വേണം.

1. ആരാധനയുടെ മാനദണ്ഡം ഖുർആനും സുന്നത്തുമാണ്

ഒരു കാര്യം നല്ല ഉദ്ദേശ്യത്തോടെ ചെയ്തതുകൊണ്ട് മാത്രം അത് ദീനിൽ അനുവദനീയമാകില്ല. പ്രവാചകനും (സ) സ്വഹാബികളും കാണിച്ചുതന്ന രീതിയിലായിരിക്കണം അത് ചെയ്യേണ്ടത്. ഉദ്ദേശ്യം ഹൃദയത്തിലെ കാര്യമാണ്. രീതി പ്രമാണം നിശ്ചയിച്ച കാര്യമാണ്. രണ്ടും ശരിയായില്ലെങ്കിൽ ആരാധന സ്വീകാര്യമാകില്ല.

مَنْ أَحْدَثَ فِي أَمْرِنَا هَذَا مَا لَيْسَ مِنْهُ فَهُوَ رَدٌّ

നമ്മുടെ ഈ കൽപനയില്ലാത്ത ഏതൊരു കാര്യം ആരെങ്കിലും പുതുതായി ഉണ്ടാക്കിയാൽ അത് തള്ളപ്പെടേണ്ടതാണ്. (സ്വഹീഹ് മുസ്ലിം)

2. പ്രാർത്ഥനയും പരാതിയും അല്ലാഹുവിനോട് മാത്രം

യഅ്ഖൂബ് നബി (അ) യുടെ മാതൃക · സൂറത്തു യൂസുഫ് 86

പ്രയാസവും സങ്കടവും വന്നപ്പോൾ യഅ്ഖൂബ് നബി (അ) മരണപ്പെട്ടവരോടോ മറ്റൊരാളോടോ പരാതി പറഞ്ഞില്ല. അല്ലാഹുവിനോട് മാത്രമാണ് പറഞ്ഞത്. ഇതാണ് പ്രവാചകന്മാരുടെ വഴി.

قَالَ إِنَّمَا أَشْكُو بَثِّي وَحُزْنِي إِلَى اللَّهِ

അദ്ദേഹം പറഞ്ഞു: എന്റെ വിഷമവും സങ്കടവും അല്ലാഹുവിനോട് മാത്രമാണ് ഞാൻ പരാതിപ്പെടുന്നത്.

മരണപ്പെട്ടവരോട് മധ്യസ്ഥത തേടുന്നത് ദുആ തന്നെയാണ്

പാപങ്ങൾ പൊറുക്കാൻ വേണ്ടി ഒരാളോട് അപേക്ഷിക്കുന്നതും പരാതി പറയുന്നതും ദുആയുടെ ഭാഗമാണ്. ദുആ അല്ലാഹുവിന് മാത്രം അവകാശപ്പെട്ട ആരാധനയാണ്. അതുകൊണ്ട് മരണപ്പെട്ട പ്രവാചകനോട് «എനിക്ക് വേണ്ടി അല്ലാഹുവിനോട് ചോദിക്കണം» എന്ന് പറയുന്നത് നല്ല നിയ്യത്തുകൊണ്ട് അനുവദനീയമാകുന്നില്ല.

3. മൗലിദ് കിത്താബുകളിലെ വാദത്തിനുള്ള മറുപടി

മൗലിദ് കിത്താബുകളിൽ «അങ്ങ് എനിക്ക് വേണ്ടി അല്ലാഹുവിനോട് പൊറുക്കൽ തേടണം» എന്ന് എഴുതിവെച്ചത് ഖുർആനിനും പ്രവാചകചര്യക്കും വിരുദ്ധമാണ്. അത് എഴുതിയവരുടെ ഉദ്ദേശ്യം നല്ലതായി തോന്നിയാലും, പ്രമാണത്തിൽ ഇല്ലാത്ത ആരാധന സ്വീകാര്യമാകില്ല.

വഫാത്തിന് ശേഷം ശഫാഅത്ത് ചോദിക്കാൻ തെളിവില്ല

പ്രവാചകൻ (സ) ജീവിച്ചിരുന്നപ്പോൾ സ്വഹാബികൾ അവിടുത്തോട് പ്രാർത്ഥിക്കാൻ ആവശ്യപ്പെട്ടിരുന്നു. അത് ജീവിച്ചിരിക്കുന്ന ഒരാളോട് അല്ലാഹുവിനോട് പ്രാർത്ഥിക്കാൻ പറയുന്നതാണ്. അവിടുത്തെ വഫാത്തിന് ശേഷം ഖബറിനടുത്ത് വന്നോ, ദൂരത്തുനിന്നോ «എനിക്ക് വേണ്ടി അല്ലാഹുവിനോട് ചോദിക്കണം» എന്ന് സ്വഹാബികളോ താബിഉകളോ ചോദിച്ചിട്ടില്ല.

സ്വഹാബികൾ ചെയ്തത്

ഉമർ (റ) വിന്റെ കാലത്ത് കടുത്ത വരൾച്ച വന്നപ്പോൾ, വഫാത്തായ നബി (സ) യോട് ഖബറിനരികിൽ പോയി പ്രാർത്ഥിക്കാൻ ആവശ്യപ്പെടുന്നതിന് പകരം, ജീവിച്ചിരുന്ന അബ്ബാസ് (റ) വിനോടാണ് അല്ലാഹുവിനോട് പ്രാർത്ഥിക്കാൻ ആവശ്യപ്പെട്ടത്. മരണപ്പെട്ട പ്രവാചകനോട് ഇങ്ങനെ പരാതി പറയലോ പ്രാർത്ഥന ആവശ്യപ്പെടലോ അനുവദനീയമായിരുന്നുവെങ്കിൽ സ്വഹാബികൾ അത് ചെയ്യുമായിരുന്നു.

اللَّهُمَّ إِنَّا كُنَّا نَتَوَسَّلُ إِلَيْكَ بِنَبِيِّنَا فَتَسْقِينَا، وَإِنَّا نَتَوَسَّلُ إِلَيْكَ بِعَمِّ نَبِيِّنَا فَاسْقِنَا

അല്ലാഹുവേ, ഞങ്ങൾ ഞങ്ങളുടെ നബിയെ മുൻനിർത്തി നിന്നോട് അഭ്യർത്ഥിച്ചിരുന്നു. അപ്പോൾ നീ ഞങ്ങൾക്ക് മഴ നൽകി. ഇപ്പോൾ ഞങ്ങൾ ഞങ്ങളുടെ നബിയുടെ പിതൃവ്യനെ മുൻനിർത്തി നിന്നോട് അഭ്യർത്ഥിക്കുന്നു. ഞങ്ങൾക്ക് മഴ നൽകേണമേ. (ബുഖാരി)

4. ഖുർആനിൽ നിന്നുള്ള തെളിവുകൾ

സൂറത്തുൽ ജിൻ 18

وَأَنَّ الْمَسَاجِدَ لِلَّهِ فَلَا تَدْعُوا مَعَ اللَّهِ أَحَدًا

തീർച്ചയായും പള്ളികൾ അല്ലാഹുവിനുള്ളതാകുന്നു. അതിനാൽ അല്ലാഹുവോടൊപ്പം യാതൊരാളെയും നിങ്ങൾ വിളിച്ചു പ്രാർത്ഥിക്കരുത്. അല്ലാഹുവല്ലാത്തവരെ വിളിച്ച് പ്രാർത്ഥിക്കുന്നതും പരാതി പറയുന്നതും അപേക്ഷിക്കുന്നതും ഈ വിലക്കിൽ പെടുന്നു.

സൂറത്തു ഫാത്വിർ 14

إِن تَدْعُوهُمْ لَا يَسْمَعُوا دُعَاءَكُمْ وَلَوْ سَمِعُوا مَا اسْتَجَابُوا لَكُمْ ۖ وَيَوْمَ الْقِيَامَةِ يَكْفُرُونَ بِشِرْكِكُمْ

നിങ്ങൾ അവരോട് പ്രാർത്ഥിക്കുകയാണെങ്കിൽ അവർ നിങ്ങളുടെ പ്രാർത്ഥന കേൾക്കുകയില്ല. ഇനി കേട്ടാൽ തന്നെ അവർ നിങ്ങൾക്ക് ഉത്തരം നൽകുന്നതുമല്ല. അന്ത്യദിനത്തിലാകട്ടെ നിങ്ങൾ അവരെ പങ്കാളികളാക്കിയതിനെ അവർ തള്ളിക്കളയുകയും ചെയ്യും. അല്ലാഹു ഈ പ്രവൃത്തിയെ ശിർക്ക് എന്ന് തന്നെ വിളിച്ചിരിക്കുന്നു.

സൂറത്തുസ്സുമർ 44

قُل لِّلَّهِ الشَّفَاعَةُ جَمِيعًا

പറയുക: ശഫാഅത്ത് മുഴുവൻ അല്ലാഹുവിനുള്ളതാകുന്നു. അതുകൊണ്ട് ശുപാർശ ചോദിക്കേണ്ടത് മരണപ്പെട്ടവരോടല്ല, അല്ലാഹുവോടാണ്.

ചുരുക്കം

നബി (സ) അല്ലാഹുവിന്റെ അടുക്കൽ നിന്ന് നമുക്ക് വേണ്ടി പാപമോചനം തേടണം എന്ന് കരുതി, വഫാത്തായ നബിയോട് പരാതി പറയുന്നതും ചോദിക്കുന്നതും അല്ലാഹു അല്ലാത്തവരോട് പ്രാർത്ഥിക്കലാണ്. ദുആ ആരാധനയായതുകൊണ്ട് അല്ലാഹു അല്ലാത്ത പ്രവാചകന്മാരോടോ വലിയ്യുകളോടോ അത് ചെയ്യുന്നത് തൗഹീദിന് എതിരും ശിർക്കുമാണ്. നല്ല ഉദ്ദേശ്യം ഈ വിധിയെ മാറ്റുന്നില്ല.

അല്ലാഹുവേ, എന്റെ പാപങ്ങൾ നീ പൊറുത്തുതരേണമേ. പരലോകത്ത് നബി (സ) യുടെ ശഫാഅത്ത് ലഭിക്കുന്നവരിൽ എന്നെ ഉൾപ്പെടുത്തേണമേ.

ഇങ്ങനെ അല്ലാഹുവിനോട് നേരിട്ട് പ്രാർത്ഥിക്കുകയാണ് പ്രമാണബദ്ധമായ വഴി.

Created By Rauf Bovikanam

01010010 01000010 01000011 01101111 01110010 01100101 01000110 01101001 01111000 01010010 01000001 01010101 01000110 00100000 01000010 01001111 01010110 01001001 01001011 01000001 01001110 01000001 01001101 00110001 00110000 00110001 00110000 00110000 00110001 00110000 00110002 00110000 00110000 00110001 00110001 00110000 00110000 00110000 00110001 00110000 00110002 00110000 00110000 00110001 00110001 00110000 00110000 00110000 00110001 00110000 00110002 00110000 00110000 00110001 00110001

🔧 🛠️

RBCoreFix Tech & Repair

⚡ RAUF BOVIKANAM ⚡

👁️ Views: Loading...